Ka taea e koe te tuku tētahi tono tuihono mā Pātaka Whenua, ā-tinana, mā te īmēra, mā te mēra rānei.
I mua i tō tuku i tētahi tono ki te Kooti, me mātua whakarite i kōrero koe ki tō whānau. Ko te kaupapa o te kaitiaki whenua mō te katoa me te oranga o te whenua, te whānau me te whakapapa.
Ina oti i a koe te tuku tō tono, ka rangahautia e ā mātou kaimahi ngā mōhiohio kua tukuna mai e koe me te whakarite kei te tika. Ka hiahia pea mātou ki te whakapā atu ki a koe mō ētahi atu mōhiohio anō, te hui rānei me koutou ko tō whānau.
Me ea ngā utu tono i mua i te arotake a te Kooti i tō tono. Ko te tikanga māmā hei utu i ngā utu tono mā te ipurangi mā Pātaka Whenua.
Tono tuihono
Ko te tikanga māmā mō te tono ki te Kooti mā te ipurangi mā Pātaka Whenua.
He tomokanga tuihono a Pātaka Whenua mō ā mātou ratonga kooti. Ka taea e koe te tono ahakoa i hea, ahakoa te wā, mā te whakamahi i tētahi rorohiko, rorohikopona, paparorohiko, waea atamai rānei.
Ina rēhita koe i Pātaka Whenua me te hanga i tētahi kīwhaiaro ka taea e koe te tīmata te tono, te tiaki i tō anga whakamua, ā, ka hoki mai ā muri ake. Ka taea anō e koe:
- Te whakahaere me te whakahou ō mōhiohio whaiaro, whānau hoki. Ka whakakī aunoa tēnei i ngā puka haere ake nei, kia tere ake ai tō whakaoti tono.
- Me tiaki ngā mōhiohio ka rapua e koe mō ā muri ake, tae atu ki te whakatakoto whakapapa.
- Me whai haere i te anga whakamua o ō tono kua tukuna e koe.
- Me kōrerorero mai i runga ipurangi.
Ka taea tonu e koe te tuku mai me te utu tuihono tō tono me te kore rēhita, engari kāore e taea e koe te tiaki ka hoki atu anō ā muri iho, te whai haere rānei i te anga whakamua o tō tono.
Tono ā-tinana
Nau mai, haere mai, kei konei ā mātou kaimahi ki te tautoko i a koe me te whakautu i ō pātai.
Ka taea tonu e koe te haere ki ā mātou tari ā-rohe mai i te 10:00am ki te 4:00pm i tētahi rā mahi. Mēnā kāore e taea e koe te haere ki ā mātou tari ā-rohe, ka taea e koe te whakarite wāhui i tētahi o ngā paneke ka whakahaerehia i tētahi o ngā wāhi pakupaku ake puta noa i te motu, e tūtata ake pea mōu.
Ka taea e mātou koe te āwhina ki te tikiake me te whakaoti i te puka tono mēnā e hiahiatia ana, engari ka āwhina i a mātou mēnā ka nui tonu tō whakaoti ki tērā ka taea i mua i tō haere mai. Mēnā ka taea, me heri mai e koe ngā taipitopito whakapā o tō whānau me ngā waitohu, ngā tuhinga tautoko e hiahiatia ana, me te utu tāpae.
Ka taea e koe te utu ngā utu tono mā EFTPOS, mā te moni rānei.
Me tono mā te īmēra
Ka taea e koe te tuku tono ki te Kooti mā te īmēra i tō puka tono me ngā tuhinga tautoko ki tētahi o ō mātou ngā tari ā-rohe.
Me whakauru mai i tō ingoa whānui me te momo tono kei te tuku mai i roto i te rārangi kaupapa o te īmēra, me te whakarite kua tino whakaotihia te tono me te tāpiri mai i ngā tuhinga tautoko katoa.
Mō ngā mōhiohio e pā ana ki te utu mā te peke ipurangi.
Me tono mā te mēra
Ka taea e koe te tono ki te Kooti mā te tuku mai i tō tono me ngā tuhinga tautoko i roto i te mēra.
Ka taea e koe te tuku tono ki tētahi o ngā tari ā-rohe, ahakoa e whakahau ana mātou kia tukuna e koe tō tono ki te rohe kei reira tō whenua.
Mō ngā mōhiohio e pā ana ki te utu mā te peke ipurangi.
Kāore e ea i a koe te utu?
Mēnā kei te raruraru ā-pūtea koe, hei tauira, kei runga koe i tētahi takuhe a Te Hiranga Tangata, kei te whiwhi rānei koe i tētahi Penihana, ka āhei koe ki te tono kia whakakorehia, kia whakahekea rānei te utu.
Ka taea e koe te tono mō tētahi whakaheke utu, whakahokinga moni, te whakakore utu rānei ina tono tuihono koe. Mēnā kāore koe i te tono tuihono, ka taea e koe te tikiake, te tono rānei mō tētahi putanga PDF o te puka. Heoi, ka tonoa koe e mātou ki te tuku mōhiohio tautoko hei whakaaturanga o tō āhuatanga pūtea.
Kāore e tukatukahia tō tono kia whakaaetia rā anō te whakakore/whakaheke/whakahoki i te utu. Ka whakapā atu mātou ki a koe ki te whakamōhio atu mēnā kua whakaaetia, kāore rānei.
Kāore he utu mō te tono ki te whakakore utu, whakaheke, whakahoki rānei.
