Ka taea te hoko ngātahi te whenua Māori, te wehewehe rānei i waenga i ōna kaipupuri whenua mā ngā tikanga maha hei whakahaere, whakawhanake, whakamahi rānei. E kīia ana tēnei ko ‘taitara whakapai ake‘.
Ki tēnei whārangi
I mua i te tono kia huria, kia wehea rānei ō whenua, me mātua whai i te tautoko me te whakaae a ērā atu kaipupuri whenua me ngā kaipupurihea, taratī rānei. Me kōrero anō koe ki ētahi atu kaipupuri whenua, kaipupurihea, me ngā taratī mō ō whakaritenga. Me mātua uru ki tō tono ko ngā whakaaturanga kua oti i a koe ērā kōrero ka mutu i whakaaroarohia e koe te pānga o ō huringa e marohitia ana ki ētahi atu kaipupurihea.
Ngā wāwāhanga
Ko te wāwāhanga te wāhanga o te whenua i waenga i ōna kaipupuri whenua hei hanga taitara hou, poraka hou rānei. Ka huria e tēnei te rahi, te āhua, me te whai hea rānei i roto i te whenua kua wāwāhia. Mō te wāwāhanga:
- Me whai whakaaetanga ngā kaipupuri whenua, e kitea rānei te nui o te tautoko kei te wāriu o te whenua me ngā hea (i mua i te wāwāhanga).
- Te wāriu o ngā poraka hou (i muri i te wāwāhanga).
- Ngā whakaritenga kuhunga ki ia poraka hou, ngā poraka rānei.
- Me te tohatoha i ngā pānga me ngā hea, ngā whai hea rānei i roto i ngā poraka whenua hou.
Me toro atu koe ki tētahi kairūri whai raihana hei whakarato i tētahi mahere rūri o ngā poraka hou hei tautoko i tō wāwāhanga.
Whakakotahitanga
Ka whakamoanatia e te whakakotahitanga ngā poraka whenua Māori hei hanga i tētahi poraka hou me te puritanga whenua ngātahi. Pērā anō i te wāwāhanga, ko te poraka ka whakakotahitia kei te:
- whakaaetanga, he nui rānei te tautoko mai i ngā kaipupuri whenua
- kei te wāriu o ia poraka whenua me ngā hea (i mua i te whakakotahitanga)
- te wāriu o te poraka whenua hou (i muri i te whakakotahitanga)
- ngā whakaritenga kuhunga ki te poraka whenua hou, me
- te whai hea hou, e ai ki te wāriu o ngā hea i mua o te whakakotahitanga, i roto i te poraka whenua hou.
Ko ngā hea i roto i te poraka kātahi anō ka whakakotahitia ka whakatauhia i runga i te wāriu o ngā hea i ia poraka i mua i te whakamoanatanga. Koinei e hira ai te uara o ia poraka i mua i te whakakotahitanga.
Ko ngā painga o tētahi whakakotahitanga:
- ko te waihanga i tētahi poraka whenua nui me te mana puritanga whenua ngātahi
- ka taea e tēnei te whakamahi te whenua me te whakahaere hei poraka kotahi kaua hei poraka maha
- kāore e hiahiatia he whakaaetanga i raro i te Resource Management Act 1991, ka mutu
- kāore he here mō ngā takoha whenua mō ngā rori, whenua rāhui, whakamahinga tūmatanui, kuhunga tūmatanui rānei.
Me whai tonu i ngā whakaaetanga whakamahi whenua noa, pērā i ngā whakaae hanga whare, whai muri i tētahi whakakotahitanga.
Ngā whakahiatotanga
Kāore e pērā i ētahi taitara whakapaitanga, kāore e huria e te whakahiatotanga te taitara o te whenua. Engari ia, he hanga i tētahi rārangi puritanga whenua ngātahi i roto i te poraka kotahi, neke atu rānei o te whenua me te kore whakakotahi, wehe rānei i aua poraka.
Pērā anō i tētahi whakakotahitanga, ko ngā whai hea ka puta kei te:
- whakaaetanga, he nui rānei te tautoko mai i ngā kaipupuri whenua
- wāriu o ia poraka me ngā hea (i mua o te whakahiatotanga), me
- te whai hea hou, e ai ki te wāriu o ngā hea i mua o te whakahiatotanga, i roto i te whakahiatotanga hou.
Ko ngā kaipupurihea i roto i te rārangi whakahiato ka noho hei kaipupurihea i roto i ngā poraka whenua katoa kua whakaurua ki te whakahiatotanga, nō reira he mea nui te wāriu o ngā hea i roto i ia poraka i whakahiatohia i mua.
Ko ngā painga o tētahi whakahiatotanga:
- ko tētahi rārangi puritanga whenua ngātahi i roto i ngā poraka whenua maha
- he tiaki i ngā taitara taketake me ngā poraka
- ka taea te whakahaere te puritanga whenua hei rārangi kotahi
- kāore e hiahiatia he whakaaetanga i raro i te Resource Management Act 1991, ka mutu
- kāore he here mō ngā takoha whenua mō ngā rori, whenua rāhui, whakamahinga tūmatanui, kuhunga tūmatanui rānei.
Me whai tonu i ngā whakaaetanga whakamahi whenua noa, pērā i ngā whakaae hanga whare.
Wehenga whenua
Ka taea tētahi wehenga whenua tūmataiti, me te kore tuku tono ki te Kooti Whenua Māori, mēnā:
- ka whakaae ngā kaipupuri whenua tika katoa ki te wehenga whenua (mēnā kāore he tarahiti)
- ka whakaae ngā taratī katoa ki te wehenga whenua (i whakatakaia ai te whenua ki raro i ngā taratī)
- e whakaae ana te kōmiti whakahaere o tētahi kaporeihana whenua Māori (i whakatakaia ai te whenua ki roto i tētahi kaporeihana whenua Māori)
- ko ngā taitara hou, ka tukuna e Toitū Te Whenua (LINZ), he ōrite ngā kaipupuri whenua i roto i ia taitara hou, pērā i mua o te wehenga whenua, ā,
- ka noho whenua Māori korehere tonu ngā taitara hou.
Kei te kaitono te kawenga mō te whakarite kei te ū ngā wehenga whenua ki te ture me te utu i ngā nama e pā ana ki te wehenga whenua, pērā i tētahi rūri hou, ngā taitara, me ngā whakaaetanga rawa.
Me wawe tonu te tuku mai i tētahi kape o ngā taitara hou me ngā mahere rūri ina oti tētahi wehenga whenua tūmataiti kia pai ai tā mātou whakahou i ā mātou pūkete hei whakaata i ngā huringa.
Tērā rānei, ka taea te hanga tētahi wehenga whenua e tētahi whakatau rohenga mā te Kooti Whenua Māori.
