Te haere atu ki te hui takawaenga
Attending mediation

He ratonga koreutu, tūao, tikanga Māori tā mātou ratonga whakatau wenewene e taea ai e ngā tāngata te whakatau matatapu i ngā whakatau wenewene e pā ana ki te whenua Māori, i waho o te kooti. Ka ārahi ō tātou mātāpono i tā tātou hātepe, ā, ko te tūmanako ka kauawhitia e te katoa i a rātou ka whakauru me te puta mai i te hui takawaenga i runga i te whāinga o te rapu rongoā.

Ka taea e ngā tāngata te kōrero ki a rātou anō me te whiriwhiri i ngā otinga tōtika e whakaae katoa ana rātou. Ka āwhina anō pea ki te whakakotahi anō i ngā hononga kua noho raru me te whakaea i ētahi o ngā mamae e pā ana ki ngā raruraru whanaungatanga. Kei reira tētahi kaitakawaenga ki te tautoko i te katoa, arā, i a koutou ko tō whānau, me te tuku whakaaro tōkeke ina whakarite ana i ngā take. Ko te tūmanako ka whakaae tahi ki tētahi whakataunga mō te anga whakamua me te kore uru mai o te ture. He tūao tēnei ratonga, nō reira me mātua whakaae ngā tāngata katoa kei roto i te wenewene ki te whakauru atu.

I tēnei horopaki, ko ngā tikanga ka arahina e ō uara, whakapono, tikanga hoki hei whānau, hapū rānei. Mā te tikanga pea e tohu ko wai kei roto, ki hea whakatau ai i te raruraru, ā, me pēhea te whakahaere i te takawaenga. Kei roto pea ko te pōhiri, whakatau, mihimihi, karakia, waiata, koha, kai me ētahi o ō tikanga. Ka whakahaerehia tētahi hui i mua i te hui takawaenga me ngā taha katoa e taea ai e koutou te whakatau ngā tikanga mō te hui takawaenga.

Kāore he utu mō te ratonga whakatau wenewene. Engari, māu anō e utu tō haere atu ki te hui takawaenga me ngā tohutohu ture motuhake ka rapua e koe.

I tēnei wā, ko ngā kaiwhakawā o te Kooti Whenua Māori ngā kaitakawaenga. Ahakoa kei te noho ngā kaiwhakawā hei kaitakawaenga, kua kore e taea e rātou te whakawā taua take i te kooti. Ā tōna wā, ka whakarato te kooti i ngā kaitakawaenga ehara nō te ture kei a rātou ngā pūkenga tika hei whakatau i ngā wenewene mō te whenua Māori.

1. Tono mō te whakatau wenewene

Ka āhei koe ki te tono mō te whakatau wenewene mō tētahi take e pā ana ki te whenua Māori mēnā e whakaae ana ngā tāngata katoa kei roto i te raruraru ki te whakamahi i tēnei ratonga.

Mēnā he tono onāianei tāu i roto i te Kooti Whenua Māori kua tōmuri nā tētahi wenewene, ka āhei koe kia whakatārewahia tō tono i a koe e whakamātau ana i te hātepe whakatau wenewene.

Ka tonoa anō pea e te kaiwhakawā tētahi raru take ka ara ake i ngā whakahaerenga kooti ki te ratonga whakatau wenewene.

2. Te takatū mō te hui takawaenga

Ina oti i a koe tētahi tono, ka whakapā atu mātou ki a koe mō te whakareri mō te hui takawaenga. Ka āwhina mātou i a koe ki te:

• tohu i tētahi kaitakawaenga
• whakaū i tētahi rā pai, wāhi hoki mō te hui takawaenga

3. Te haere atu ki te hui takawaenga

I te hui takawaenga, ka takawaenga te kaitakawaenga i ngā kōrero me te wānanga i waenga i ngā taha mō te raruraru me te ārahi i a rātou ki te rapu i tā rātou ake rongoā tōtika.

Me kī, ina tae atu koe ka whakatauhia ngā taha kaha kātahi ka whakamārama i ngā whakahaere mō te hui takawaenga, tae atu ki ētehi o ngā tikanga kua whakaaetia e koutou.

Ko ngā kōrerorero hei whakatau i te wenewene he matatapu ki a koutou ko tō whānau me ētahi atu kei roto. Kāore e hopukia ēnei kōrerorero mā te iwi whānui ki te pūkete a te Kooti Whenua Māori.

Mēnā ka taea he whakaaetanga mā te hui takawaenga, ka tuhia e te kaitakawaenga ngā ture o te whakaaetanga ka tuku ai ki te Kooti Whenua Māori. Ka tukuna pea e te kaiwhakawā he whakatau kooti hei whakamana i tērā i whakaae tahitia e ngā taha katoa, ā, ka noho tērā hei pūkete kooti.

Ka whiwhi koe i tētahi kape tuhi o te putanga mai i tō hui whakatau wenewene. Me noho tēnei ki tētahi wāhi pai i te mea ka hiahia koe i tēnei ki te whakatau he aha atu anō ngā mahi pea hei whai māu. Arā pea, ko te:

• haere tonu me te tono onāianei i te Kooti Whenua Māori
• tuku tono atu anō ki te Kooti Whenua Māori
• rapu tohutohu, te haere tonu rānei o te hui takawaenga me taua kaitakawaenga anō, he mea rerekē rānei.

Mēnā kāore e whakaae tahi ngā taha e rua, ka whakamōhio atu te kaitakawaenga ki te Kooti Whenua Māori. Kei reira ngā kōwhiringa e wātea ana ina whai whakaaro ana ki mahi whai ake hei whakatau i te wenewene, tae atu ki te haere ki te kooti, te hoki rānei ki te hui takawaenga me taua kaitakawaenga anō, he mea rerekē rānei.