Te kimi i ō whenua
Find your land

He mahi wā roa pea te rapu i ngā mōhiohio mō te whenua. He whaitake tonu te kōrero ki tō whānau mō ō whenua me ngā whakapapa i mua i te tīmatanga. He pai tonu te pātai atu ki a rātou mō ēnei mea:

• He aha ngā poraka whenua kei roto pea koe

• Tētahi whakaaturanga tika o tō whakapapa

• I pēhea tō uru hei kaipupuri whenua, kaiwhaipānga rānei ki tō whenua.

Ina whakaūngia e koe ēnei taipitopito, ka kitea e koe ētahi mōhiohio atu anō mā ngā pūtake e whai ake:

Mēnā e hiahia ana koe ki te tiro i ngā kape ōkiko o te pūkete kooti, ka āhei koe ki te haere ki tētahi o ō mātou tari ā-rohe. Mēnā kei te mōhio koe he aha ngā tuhinga e hiahia ana koe ki te tiro, me whakamōhio mai i mua kia pai ai tā mātou whakarite mai mō tō taenga mai.

Ka taea anō e mātou te tuku putanga kua matawaia/tāia rānei o ngā pūkete mā te pōhi, īmēra rānei (ina taea). Mō ngā putanga tā, he 20 heneti te utu mō ia whārangi mā me te pango me te 40 heneti mō ia whārangi tae.

E puritia ana e Toitū Te Whenua he mōhiohio mō ngā whakawhititanga o mua rā anō, te rūri i ngā taitara, whenua rānei kua whakawhitia ki te whenua tukipū. Ka taea e koe te tono kape o ngā pūkete whenua e rēhita ana me rātou.

Kei a Te Puni Kōkiri ngā pūrongo Tōku Whenua kei tā rātou paetukutuku Tupu. Ka taea e ēnei pūrongo te tuku mōhiohio mō tētahi poraka whenua, ā, ka taea te āwhina i a koe ki te:

• rapu kei hea te whenua — ka kitea e koe ngā rohenga o te whenua me te kimi kei hea i runga i te mapi
• tiro ngā whakaahua ā-rangi o te whenua me tōna āhua ināianei
• rapu mōhio mō te taiao, ōhanga, me te āhuarangi kei reira te whenua
• whai mōhiohio mō te whenua ake — mō te oneone, wai, auheke, me ngā otaota.